Nokkur skotheld heimilisráð

Já ég er ein af þeim sem leitar af endalausum ráðum sem einfalda þrif og almennt einfalda líf mitt á einhvern hátt, hvort það er að þrífa gólf eða sniðugar leiðir til að skipuleggja heimilið, bara hvað sem er.

Ég er hérna búin að safna saman nokkrum snilldar ráðum sem ég hef rekist á síðustu vikur, mánuði og prófað!

1. Um helgina fór ég í svona kósí „fluffy“ sokka, sem eru bara tilvaldnir í að þurrka ryk af listum og gólfi og ekkert vesen. Ferð í sokkana og dundar þér eða dansar. Jú þú munt líta út eins og hálfviti en hvað með það? og hey ef þú att börn skelltu þeim í svona sokka og láttu þau dansa um heimilið með þér, þau þurfa ekkert að vita að þau séu að gera húsverk.

2. Setja ilmolíudropa í pappann á klósettrúllunni (kem ég með eitt annað ilm ráðið) en þetta er snilld, svo þegar rúllan er búin þá bara skelli ég dropum í næstu rúllu.

3. Ég er að fara að gera myndavegg bráðum og sá þessa snilldar leið til að raða myndunum, en það er að klippa blöð í sömu stærð og myndaramminn og raða svo blöðunum á vegginn, minna vesen og sérð akkúrat hvernig þetta er á veggnum.

4. Þegar hurðar eru byrjaðar að ískra þegar þær eru opnaðar/lokaðar, hvort það sé hurðarhúnninn eða skrúfurnar þá hef ég notað smá quick fix og notað olíu en eg er klaufi og helli oft olíu útum allt.. þannig eg er byrjuð að nota örlítið af uppþvottalögum til að bera á, enginn sóðaskapur og góð sápulykt í leiðinni.

5. Við notum ekki mýkingarefni, fer illa með húðina á krökkunum en ég er byrjuð að nota edik og smá sjampú til að mýkja þvottinn. Ég dassa þetta bara en held að það sé bara sama magn af hverju t.d 1 dl edik 1 dl sjampú og blanda vel saman.

6. Ef fatnaður minnkar í þvotti hjá mér þá hef ég skellt því í ísbað með hárnæringu í og læt liggja í einhvern tíma, ég hef reyndar bara prófað boli og það virkar fínt.

7. Ég á ekki drullusokk… bara af því mér finnst það ógeðslegt, en það hefur nú komið fyrir að einhver félagi sé fastur í klósettinu og þá nota ég uppþvottasápu og sjóðandi heitt vatn! Bara dass af sápunni í klósettið og hella svo slatta af sjóðandi vatni. Leysist allt allt upp.. yum.

Jæja ég vona að þið hafið fundið eitthvað sem þið getið notað eða kannski eruð þið að gera eitthvað af þessu? Megið endilega láta vita hérna í athugasemdum ♡

Þangað til næst ♡